Чӑваш Республикин Наци вулавӑшӗнче  «Эпӗ пӗчӗкҫӗ чӑваш – 2018» видеосӑвӑсен конкурсӗнче мала тухнисене чысларӗҫ.

«Эпӗ пӗчӗкҫӗ чӑваш – 2018» конкурса «Шкулта» интернет-журнал, Чӑваш чӗлхин инҫет вӗренӳ центрӗ, Чӑваш халӑх сайчӗ, ЧНК, Чӑваш наци радиовӗ тата Чӑваш Республикин Наци вулавӑшӗ пӗрле йӗркеленӗ. Ӗҫсене нарӑс уйӑхӗн 15-мӗшӗнчен пуҫласа ака уйӑхӗн пуҫламӑшӗччен йышӑннӑччӗ. Ун хыҫҫӑн тӳре комиссийӗ ӗҫсене хакласа мала тухнисене палӑртрӗ.

Чыслакансен йышӗнче Чӑваш чӗлхин инҫет вӗренӳ центрӗн ертӳҫи Владимир Андреев, ача-пӑча ҫыравҫи Николай Ишентей, Чӑваш наци конгресӗн Президиум членӗ Геронтий Никифоров, Чӑваш наци телекуравӗн редакторӗ Мальвина Петрова, наци вулавӑшӗн ӗҫченӗ Надежда Егорова, Чӑваш халӑх сайчӗн тӗп редакторӗ Аҫтахар (Николай) Плотников пулчӗҫ. Ҫӗнтерӳҫӗсене картинӑсемпе, кӗнекесемпе тата ытти парнесемпе чысларӗҫ. Ҫак конкурса «Первомайскинчи «Шуçӑм» ача пахчине çӳрекен 5çулхи Ульяна Лякова(Сител ялӗ) «Анне» сӑвӑ каласа Регионсем хушшинчи «Эпӗ пӗчӗкçӗ чӑваш-2018» видеоконкурсра хутшӑнса 2 вырӑн йышӑнчӗ. Вӑл унта татах та сӑвӑсем каласа парса савӑнтарчӗ.   Сӑмах май, конкурса хутшӑннӑ ачасем те сӑвӑ каласа пачӗҫ. Хӑш-пӗрине итлеме уйрӑмах кӑмӑллӑ пулчӗ.